Eignir tryggingarfélaga hækkuðu um 2 milljarða milli mánaða

Heildareignir tryggingarfélaganna námu 137 milljörðum kr. í lok ágúst og hækkuðu um rúmlega 2 milljarða kr. á milli mánaða.

Þetta kemur fram í hagtölum Seðlabankans. Þar segir að útlán og markaðsverðbréf námu 85,9 milljörðum kr. og hækkuðu um 3,1 milljarða kr. Hækkunin stafar aðallega af rúmlega 1 milljarðs kr. hækkun á verðtryggðum markaðsskuldabréfum sem námu 46,5 milljörðum kr og 1,9 milljörðum kr. hækkun á hlutdeildarskírteinum sem námu 15,9 milljörðum kr. í lok mánaðarins.

Handbært fé hækkaði um rúman 1 milljarð kr. og nam 12,2 milljörðum kr. Skuldir tryggingarfélaganna námu 80,6 milljörðum kr. og lækkuðu um 812 milljónir kr. Eigið fé hækkaði um 2,9 milljarða kr og nam 56,5 milljörðum kr. í lok ágúst.