Bankinn gjaldfelldi erlent lán

Fyrri eigendur Sigurplasts segja starfsmenn Arion banka hafa dreift óhróðri um þá í fjölmiðla í kjölfar yfirtöku bankans á fyrirtækinu fyrir um hálfum mánuði.

Í Fréttablaðinu á þriðjudag kom meðal annars fram að grunur léki á að fyrri eigendur og stjórnendur Sigurplasts hefðu átt við bókhald fyrirtækisins eftir að bankinn tók við rekstrinum. Þá hefði tölvukerfi fyrirtækisins verið í ólestri.

Fyrri eigendur Sigurplasts segja í tilkynningu ásakanir á hendur þeim runnar undan rifjum Arion banka. Upphaf deilna og fall fyrirtækisins megi rekja til ólögmæts gengisbundins láns sem hafi hækkað úr 330 milljónum króna í 1,1 milljarð í gengishruninu.

Fyrirtækið hafi gengið vel en ekki getað greitt af stökkbreyttu láni. Arion banki hafi ekki fallist á hugmyndir um greiðslur og gjaldfellt öll lán fyrirtækisins. Það hafi verið knúið í þrot þrátt fyrir rekstrarlegt hæfi.

Arion banki hefur lagt fram kæru á hendur fyrrverandi eigendum Sigurplasts til fjármunadeildar lögreglunnar á höfuðborgarsvæðinu. Engin afstaða hefur verið tekin til hennar þar, samkvæmt upplýsingum Tryggva Agnarssonar, lögmanni fyrrverandi eigenda Sigurplasts. - jab