Kortavelta landans erlendis heldur áfram að aukast

Kreditkortavelta landans á erlendri grundu jókst um 16% í september frá fyrri mánuði og nam 4,2 milljörðum kr., en mikill viðsnúningur hefur orðið í kortanotkun landsmanna á erlendri grundu undanfarna mánuði.

Þetta kemur fram í Morgunkorni greiningar Íslandsbanka þar sem vitnað er í hagtölur Seðlabankans. Í Morgunkorninu segir að þannig hafi kreditkortavelta landsmanna erlendis aukist um 35% að raungildi að meðaltali undanfarna 3 mánuði , en í fyrra varð 55% samdráttur á þennan mælikvarða yfir sama tímabil.

Þetta kemur í kjölfar þess að kaupmáttur landans á erlendri grundu hefur aukist gríðarlega undanfarið vegna styrkingar krónunnar og utanlandsferðir eru nú komnar á dagskrá á nýjan leik eftir að hafa nánast stöðvast í kjölfar hrunsins.