Hagnaður Íslandsbanka 13,2 milljarðar

Íslandsbanki skilaði 13,2 milljarða króna hagnaði eftir skatta á fyrstu þremur ársfjórðungum ársins. Eiginfjárhlutfall bankans var 22,6% sem er talsvert hærra en það 16% lágmark sem FME hefur sett bankanum. Arðsemi eigin fjár var 17,6%.

Birna Einarsdóttir, bankastjóri Íslandsbanka segir í tilkynningu um uppgjörið að rekstur bankans á þriðja ársfjórðungi hafi verið í samræmi við áætlanir. Hinsvegar sé gert ráð fyrir að rekstrarumhverfi bankans muni áfram einkennast af töluverðri óvissu.

„Vinna að lausnum á skuldavanda einstaklinga og fyrirtækja hefur verið í forgrunni á þessu ári auk þess sem við höfum á síðustu mánuðum unnið að endurreikningi á bílalánum fyrir um 5000 viðskiptavini," segir Birna.

„Þá hefur Íslandsbanki ákveðið að bjóða viðskiptavinum sínum sem skulda húnæðislán í erlendum gjaldmiðlum að endurreikna þau í samræmi við ákvæði frumvarps til breytinga á vaxtalögum sem viðskiptaráðherra hefur lagt fyrir Alþingi enda þótt enn ríki óvissa um lögmæti erlendra húsnæðislána bankans og nýlegir héraðsdómar renni stoðum undir lögmæti samninganna. Þessi vinna er þegar hafin og gerum við ráð fyrir að henni ljúki á fyrstu mánuðum nýs árs."