Sölunni á Vestia lokið

Gengið hefur verið frá kaupum Framtakssjóðs Íslands á eignarhaldsfélaginu Vestia af Landsbankanum með fyrirvara um samþykki Samkeppniseftirlitsins. Tilkynnt var um fyrirhuguð kaup þann 20. ágúst síðastliðinn með fyrirvara um niðurstöðu áreiðanleikakönnunar sem nú er lokið.

Kaupverðið á Vestia lækkar úr 19,5 milljörðum króna í 15,5 milljarða króna. Annars vegar vegna þess að verðmat eigna hefur lækkað og hins vegar hefur oðið að samkomulagi að ákveðnar eignir munu ekki fylgja með í kaupunum. Helsta breytingin frá fyrri samningi er að Landsbankinn heldur eftir 19% hlut í Icelandic Group í stað þess að selja félagið að fullu. Framtakssjóður hefur kauprétt á þeim 19% hlut í allt að 12 mánuði.

Hlutafjárloforð Landsbankans í Framtakssjóðnum lækkar úr 18 milljörðum króna í 15 milljarða króna. Ef stærð Framtakssjóðsins verður 60 milljarðar mun hlutur Landsbankans í honum þá nema 25%.

Þau fyrirtæki sem fylgja með í kaupum Framtakssjóðsins á Vestia eru Icelandic Group, Teymi, Húsasmiðjan og Plastprent.