Jöfn kynjahlutföll í framkvæmdastjórninni

Átta nýir framkvæmdastjórar voru ráðnir til Landsbankans í fyrradag, en þeir munu hver stýra sínu sviði í nýju skipuriti bankans. Alls sóttu um 300 manns um stöðurnar. Ráðin voru þau: Árni Þór Þorbjörnsson, Frans Páll Sigurðsson, Helgi Teitur Helgason, Hjördís Dröfn Vilhjálmsdóttir, Hrefna Ösp Sigfinnsdóttir, Hreiðar Bjarnason, Jensína Kristín Böðvars­dóttir og Perla Ösp Ásgeirsdóttir.

Kristján Kristjánsson, upplýsingafulltrúi Landsbankans, segir í samtali við Markaðinn að um sé að ræða áherslubreytingu í starfi bankans. „Við erum að setja mun meiri áherslu á viðskiptavinina þar sem við vinnum eftir lykilhugtökunum: hlusta, læra og þjóna.“

Í tilkynningunni vekur bankinn athygli á því að í hópi nýju framkvæmdastjóranna eru jafn margar konur og karlar. Kristján segir að það sé meðvitað framtak, enda sé jafnrétti eitt af hugtökunum sem eru í stefnu Landsbankans.

Skuldavandi heimila og fyrirtækja er eitt af stærstu viðfangsefnum Landsbankans að sögn Kristjáns. Til að bregðast við því, eru í skipuritinu tvær einingar, heilt svið til að þjóna fyrirtækjum og ný ráðgjafastofa fyrir heimili í skuldavanda.

- þj