Nýtt og endurbætt greiðslukerfi hjá Vinnumálastofnun

Vinnumálastofnun mun taka upp nýtt og endurbætt greiðslukerfi atvinnuleysistrygginga 1. október. Með nýju greiðslukerfi verða atvinnuleysistryggingar reiknaðar út frá mánuðum í stað daga eins og verið hefur og framsetning upplýsinga á greiðsluseðli verður skýrari.

Fjallað er um málið á vefsíðu stofnunarinnar. Þar segir að það sé von Vinnumálastofnunar að breytingin verði til þess að gera útreikning atvinnuleysistrygginga auðskiljanlegri fyrir viðskiptavini. Þar sem breytingin er umsvifamikil biður stofnunin viðskiptavini að sýna skilning á því ef upp kunna að koma villur í greiðslum.

Á heimasíðu Vinnumálastofnunar er hægt að nálgast skýringar á framsetningu greiðsluseðilsins. Athygli er vakin á því að á nýjum greiðsluseðli mun skuldastaða umsækjenda birtast neðst á seðlinum, en þetta á einungis við um lítinn hluta umsækjenda.

Þeir viðskiptavinir sem þurfa að fá frekari skýringar eða vilja koma ábendingum á framfæri eru beðnir um að nota netfangið greidslustofa@vmst.is í samskiptum við Greiðslustofu frekar en að nota símann til að flýta fyrir úrlausn mála.