Arion banka heimilt að yfirtaka BM Vallá

Samkeppniseftirlitið hefur ákveðið að heimila yfirtöku Arion banka á BM Vallá en eftirlitið segir yfirtökuna fela í sér samruna. Yfirtökunni eru sett ströng skilyrði.

Meðal þeirra skilyrða sem sett eru fyrir yfirtökunni má nefna að Arion banki skal selja eignarhlut sinn í BM Vallá eins fljótt og verða má. Salan skal fara fram í opnu og gegnsæju ferli.

Þá skal Arion banki tryggja sjálfstæði BM Vallár á samkeppnismarkaði. Þetta verði gert með því að eignarhaldið er sett í sérstakt eignarhaldsfélag. Hefur Arion banki stofnað Eignabjarg ehf. í þessum tilgangi.

BM Vallá skal vera rekið sem sjálfstætt félag undir Eignabjargi og skulu óháðir stjórnarmenn stjórn félaginu. Eignabjargi er þó heimilt að hafa áheyrnarfulltrúa á stjórnarfundum BM Vallár þar til félagið hefur verið selt.

Þá skal Arion banki fela óháðum aðila eða aðilum eftirlit með því að skilyrðum ákvörðunar Samkeppniseftirlitsins verði fylgt eftir.