Nefndin samþykkir fjárfestingu Magma

Nefnd um erlendar fjárfestingar sest á fund klukkan þrjú í dag til að taka ákvörðun um hvort fjárfesting kanadíska félagsins Magma Energy í HS orku, standist ákvæði íslenskra laga. Búist er við því að fundurinn standi í tvær klukkustundir. Fundurinn er framhald af fundi nefndarinnar frá því á föstudag. Þá var búist við því að niðurstaða fengist í málið.

Eftir því sem fréttastofan kemst næst, þá telur meirihluti nefndarinnar að fjárfestingin standist íslensk lög.

Takmarkanir eru á fjárfestingu erlendra aðila í sjávarútvegi, orkufyrirtækjum og í flugi. Einungis íslenskir aðilar og aðilar af evrópska efnahagssvæðinu mega eiga í orkufyrirtækjum hér.

Kanadíska félagið á ríflega 40 prósenta hlut í HS orku í gegnum sænskt dótturfélag sitt, Magma Energy Sweden. Félagið var sérstaklega stofnað í þeim tilgangi að fjárfesta hérlendis.

Heimildir fréttastofu herma að enda þótt engin starfsemi sé í sænska skúffufélaginu, þá standist fjárfestingin lög, þar sem félagið uppfylli öll skilyrði sænskra laga.

Þetta mun vera byggt á ýmsum lögfræðiálitum sem nefnd um erlenda fjárfestingu hefur látið vinna fyrir sig.