Endurskipulagningu Íslandsbanka lýkur í október

Íslandsbanki hefur í ljósi niðurstöðu Hæstaréttar einsett sér að flýta vinnu varðandi uppgjör og endurútreikning erlendra bílalána, kaupleigusamninga og einkaleigusamninga. Niðurstaða þeirrar vinnu mun liggja fyrir um miðjan október næstkomandi í þeim tilvikum þar sem ekki hefur verið um yfirtökur eða uppgreiðslur á lánasamningum að ræða samkvæmt tilkynningu frá bankanum.

Endurgreiðslur við uppgjör vegna lána sem undir dóminn falla hafa lítil áhrif á lausafjárhlutföll bankans. Lausafjárstaðan er sterk og lausafjárhlutföll vel yfir því sem reglur Seðlabanka gera kröfu um samkvæmt tilkynningu bankans.

Viðskiptaráðherra hefur boðað löggjöf þar sem tekið verður á lögmæti erlendra húsnæðislána. Á meðan beðið er boðaðrar löggjafar hvetur Íslandsbanki viðskiptavini með erlend húsnæðislán til að nýta sér þau tímabundnu úrræði sem bankinn býður og bendir sérstaklega á þann möguleika að greiða 5000 krónur af hverri milljón.

Eins og fram kemur í hálfsársuppgjöri Íslandsbanka hefur bankinn metið áhrif mögulegra niðurstaðna dómstóla vegna erlendra lána á eiginfjárhlutfall bankans. Að fenginni þessari niðurstöðu Hæstaréttar er ljóst að bankinn mun áfram uppfylla kröfur Fjármálaeftirlitsins um 16% eiginfjárhlutfall samkvæmt tilkynningu frá bankanum.