Skulda skatt vegna séreignasparnaðar

Viðskiptavinir Vista, séreignasparnaðarleiðar KB ráðgjafar, gætu átt von á tugþúsunda bakreikningi frá skattinum. Ástæðan er sú að sex greiðslur, frá þriðja mánuði samningstíma til þess áttunda, renna ekki í sparnað, sem er undanþeginn skatti, heldur í upphafsþóknun til fyrirtækisins.

Ákvæði um greiðslur viðskiptavina í upphafsþóknun KB ráðgjafar koma fram á samningum og er samkvæmt upplýsingum frá Arion banka, löglegt. Niðurstaða athugunar Ríkisskattstjóra er sú að þær greiðslur hafi ekki átt að vera frádráttarbærar skatti líkt og aðrar greiðslur í séreignasparnað.

Viðbótarlífeyrissparnaður er fjögur prósent af heildartekjum einstaklinga fyrir skatt. Er það heimilt samkvæmt skattalögum, sé fjárhæðunum varið í sparnað. En sé fjármagninu varið í afleiddan kostnað, eins og söluþóknanir fyrirtækja, stangast það á við lög. Hefur Ríkisskattstjóri þá heimild til þess að rukka inn skatta af þessum tekjum viðskiptavina Vista, fjögur ár aftur í tímann.

Ríkisskattstjóri sendi umsögn um málið til fjármálaráðuneytisins þann 19. apríl síðastliðinn í kjölfar fyrirspurnar ráðuneytisins. Kemur þar fram að nauðsynlegt sé að gera greinamun á því hvort verið sé að draga frá skattskyldum tekjum með beinum hætti afmarkaða fjárhæð vegna framlaga, það er aukins sparnaðar, eða hins vegar afleiddan kostnað, eins og söluþóknun þeirra sem seldu viðkomandi vöruna.

Með öðrum orðum er sá einstaklingur sem borgar fjögur prósent af launum sínum fyrir skatt, að borga þóknun til KB ráðgjafar í sex mánuði, einnig skattfrjálst. Slíkt er ólöglegt og hefur Ríkisskattstjóri því fulla heimild til þess að innheimta þessar vangoldnu skatttekjur hjá viðskiptavinum fyrirtækjanna.

Indriði H. Þorláksson, sérfræðingur í fjármálaráðuneytinu og fyrrverandi ríkisskattstjóri, segir að fyrirtækin sem bjóða sparnaðinn hafi undanfarið verið að skoða fyrirkomulagið. „Þau hafa staðið í ágreiningi við skattayfirvöld um þetta og því leitaði ráðuneytið álits Ríkisskattstjóra um málið," segir hann.

sunna@frettabladid.is