Væntingavísitalan yfir 50 stig í fyrsta sinn frá hruni

Fjallað er um málið í Morgunkorni greiningar Íslandsbanka. Þar segir að þetta er í fyrsta sinn frá bankahruni sem vísitalan mælist yfir 50 stigum. Vístalan mælir væntingar neytenda til efnahags- og atvinnulífsins og þegar vísitalan er undir 100 stigum eru fleiri neytendur svartsýnir en bjartsýnir.

Hin aukna bjartsýni á að stórum hluta rætur sínar að rekja til þess að væntingar neytenda til aðstæðna í efnahags- og atvinnumálum eftir 6 mánuði glæðast verulega frá fyrri mánuði, eða um fjórðung. Bjartsýnin til næstu 6 mánaða hefur ekki verið meiri síðan í maí 2008. Vonandi er meiri innistæða fyrir bjartsýninni nú heldur en þá, en eins og kom á daginn var bjartsýnin þá lítið annað en falskar vonir enda var bankakerfið hrunið hálfu ári síðar.

Væntingavísitalan byggir á svörum úr skoðanakönnun sem fer fram lungann af apríl mánuði en margt hefur gerst á því tímabili sem gefur aukna ástæðu til bjartsýni nú. Önnur endurskoðun efnahagsáætlunar AGS og stjórnvalda er loksins um garð gengin og þá er ekki loku fyrir það skotið að birting skýrslu Rannsóknarnefndar Alþingis eigi einhvern þátt í aukinni bjartsýni landsmanna nú, enda mörgum létt að skýrslan hafi nú loksins litið dagsins ljós.

Væntingar neytenda um horfur í efnahags-og atvinnumálum hafa nú glæðst um tæplega 16 stig frá sama tíma í fyrra á þennan mælikvarða. Væntingar neytenda eiga þó enn langt í land að teljast góðar, en þegar bjartsýnin var sem mest mældist vísitalan 155 stig í maí 2007. Væntingar landsmanna fóru svo minnkandi árið 2008 og hefur vísitalan verið undir 100 stigum síðan í mars það ár.

Athyglisvert verður að sjá hvernig væntingar landsmanna þróast í næsta mánuði og hvort lamandi áhrif eldgosins í Eyjafjallajökli á flugsamgöngur dragi eitthvað úr væntingum, en blikur eru nú á lofti þess efnis að gosið gæti skaðað ferðaþjónustuna í sumar.

Þá er athyglisvert nú að bjartsýni er hvað mest meðal yngsta aldurshópsins eða þeirra sem eru 16-34 ára, en verði atvinnuástandið erfitt í vor og sumar fyrir skólafólk mun mat þessa aldurshóps á atvinnulífið líklega breytast til hins verra. Á móti kemur að útlit er fyrir minni verðbólgu í maímánuði og þá er útlit fyrir að Seðlabankinn geti haldið vaxtalækkunarferli sínu áfram núna í byrjun næsta mánaðar, en hvort tveggja er líklegt til að lyfta væntingum um horfur í efnahagslífinu.