Smáralind á leið í Kauphöllina

Stjórn Fasteignafélags Íslands ehf., eiganda Smáralindar ehf., hefur samþykkt nýtt skipurit sem tekið hefur gildi. Með nýju skipuriti færist dagleg stjórnun Smáralindar ehf. til móðurfélagsins, Fasteignafélags Íslands ehf.

Í tilkynningu segir að markmið breytinganna er að mynda öfluga umgjörð um eignir Fasteignafélags Íslands ehf. og er liður í að undirbúa félagið fyrir fyrirhugaða skráningu í Kauphöll.

Sturla Eðvarðsson hefur verið ráðinn framkvæmdastjóri Fasteignafélags Íslands ehf., Eignarhaldsfélagsins Smáralindar ehf. og Smáralindar ehf.

Samhliða þessum breytingum hafa eftirfarandi stjórnendur látið af störfum; Henning Freyr Henningsson framkvæmdastjóri Smáralindar ehf. og Helgi Marinó Magnússon framkvæmdastjóri Eignarhaldsfélags Smáralindar ehf.

Eftirtaldir aðilar hafa verið ráðnir í stjórnendastöður hjá Fasteignafélagi Íslands hf.; Fjármálastjóri er Jóhann Sigurjónsson, markaðsstjóri er Guðrún Margrét Örnólfsdóttir og rekstrarstjóri er Kristinn Jóhannsson fyrrverandi rekstrarstjóri Smáralindar ehf.