MP þarf hugsanlega að selja eignir til að uppfylla skilyrði FME

Forstjóri MP banka segir að eignasafn bankans verið yfirfarið og þá verði reynt að draga úr áhættu til að uppfylla kröfur Fjármálaeftirlitsins, en eigið fé bankans er undir þeim mörkum sem eftirlitið hefur sett honum.

Í nýjasta tölublaði Fjármálastöðugleika, rits Seðlabanka Íslands, kemur fram að MP banki vinni nú að því að styrkja eiginfjárstöðu sína í samráði við Fjármálaeftirlitið.

Eigið fé bankans er undir þeim mörkum sem Fjármálaeftirlitið (FME) hefur sett honum, en bankinn hefur sent uppgjör sitt vegna fyrstu sex mánaða ársins til Fjármálaeftirlitsins til yfirferðar, en uppgjörið hefur enn ekki verið birt. Þetta kom fram í fréttum RÚV í gærkvöldi.

Gunnar Karl Guðmundsson, forstjóri MP banka, segir að ástæða þess að bankinn uppfylli ekki kröfur FME sé að MP sé fyrsti bankinn til að fara í gegnum mat á eiginfjárþörf í samræmi við nýjar reglur sem séu mun strangari en þær sem áður giltu. Bankinn uppfylli kröfur laga um fjármálafyrirtæki um eigin fé, en það er átta prósent.

Gunnar Karl segir að þessari vinna felist annars vegar í því að auka eigið fé og hins vegar draga úr áhættu. Meðal þess sem yfirfara þurfi sé eignasafn bankans og hugsanlega selja einhverjar eignir.