Á sjöunda tug misstu vinnuna

Alls var 64 sagt upp hjá tveimur fyrirtækjum á Vestfjörðum í gær. Fiskvinnslu­fyrirtækið Eyraroddi á Flateyri sagði upp öllum 42 starfsmönnum fyrirtækisins, og 22 til viðbótar var sagt upp hjá jarðverktakafyrirtækinu Ósafli í Bolungarvík.

Uppsagnirnar eru reiðarslag fyrir Vestfirði, segir Finnbogi Sveinbjörnsson, formaður Verkalýðsfélags Vestfirðinga. Hann segir að varað hafi verið við því lengi að þetta væri yfirvofandi, en stjórnvöld hafi ekki brugðist við.

Eyraroddi er langstærsti vinnustaðurinn á Flateyri, en þar starfaði rúmlega fimmtungur íbúa bæjarins átján ára og eldri.

Eyraroddi hefur verið í greiðslustöðvun frá því í maí. Kristján Erlingsson, stjórnarmaður og einn af aðaleigendum fyrirtækisins, segir að það sé kvótalaust og ekki unnt að leigja kvóta.

„Frá því í fyrrahaust hefur ekki verið nokkur grundvöllur fyrir þessu,“ segir Kristján. Hann segir enn von til þess að ný tækifæri finnist og hægt verði að ráða hluta starfsmannanna eða alla.

Ósafl er dótturfélag verktakafyrirtækisins ÍAV, og unnu starfsmenn félagsins meðal annars að gerð Bolungarvíkurganga.- bj, vg