Tapið gæti orðið enn meira

Formaður Landssamtaka lífeyrissjóða segir að sjóðirnir geti nýtt skuldajöfnun til að gera upp skuld vegna gjaldeyrisvarnarsamninga. Nettótap verði um 30 milljarðar. Hann neitar því alfarið að sjóðirnir hafi verið í braski.

Fréttastofa greindi frá því í vikunni að lífeyrissjóðirnir hefðu tapað rúmum 70 milljörðum króna á gjaldeyrisvörnum í bankahruninu. Tapið gæti orðið enn meira, gangi skilanefndir ekki að sáttatilboði sjóðanna um á hvaða gengi samningarnir verða gerðir upp.

Rannsóknarnefnd Alþingis segir í skýrslu sinni að viðskipti þriggja stærstu lífeyrissjóða landsins á gjaldeyrismarkaði séu umhugsunarverð. Svo virðist sem sjóðirnir hafi vonast eftir skjótfengnum gróða.

Arnar Sigurmundsson, formaður Landssamtaka lífeyrissjóða, segir að lífeyrissjóðirnir hafi ekki tekið þátt í gjaldeyrisbraski fyrir hrun.

„Gjaldeyrisvarnir eru þannig að það er hægt að framlengja þær og þá gerðist það sem fæstir reiknuðu með, að heilt bankakerfi fór á hausinn og sá sem annaðist gjaldeyrisvarnirnar varð óstarfhæfur. Þegar bankarnir urðu óstarfhæfir var tapstaða á þessum gjaldmiðlavarnasamningum sem nam þessari upphæð sem þú nefnir en þá hafði gengi krónunnar verið að falla. Það er rétt að lífeyrissjóðirnir hafi tekið stöðu með krónunni. Annars hefði ekki orðið tap á þessum samningum," segir hann.

Arnar segir að ekki hafi enn tekist að semja við skilanefndir bankanna um uppgjör samninganna.

„En viðræður eru samt enn í gangi. En lífeyrissjóðirnir eru með skuldajöfnun verði þetta niðurstaðan upp að 40 milljörðum á móti, þannig að nettóstaðan gangi þetta eftir er um 30 milljarðar króna," segir Arnar að lokum.