Spáir 0,5 prósentustiga stýrivaxtalækkun

Greining MP Banka spáir því að stýrivextir verði lækkaðir um 0,5% prósentustig á morgun. Þetta kemur fram í Markaðsvísi greiningarinnar.

Í Markaðsvísinum segir að líkt og áður kom fram í síðustu fundargerð peningastefnunefndar að héldist gengi krónunnar stöðugt eða styrktist og verðbólga hjaðnaði líkt og spáð var væri áfram til staðar forsendur til frekari slökunar peningastefnunnar. Hvort tveggja hefur gerst: Krónan hefur haldist stöðug frá síðustu ákvörðun og verðbólga hefur hjaðnað í takt við spár.

„Peningastefnunefndin benti einnig á að svigrúm til vaxtalækkunar yrði takmarkað á meðan veruleg óvissa ríkti um aðgengi Íslands að alþjóðlegum fjármálamörkuðum. Síðan hefur verið gengið frá annarri endurskoðun efnahagsáætunarinnar sem fól í sér aðgengi að lánsfé frá Alþjóðagjaldeyrissjóðnum og Norðurlöndunum. Framhald efnahagsáætlunarinnar er eftir sem áður háð lausn Icesave deilunnar og verður að telja líklegt að þriðja endurskoðun, sem að öðru óbreyttu er á dagskrá í júlí, kunni að tefjast af þeim sökum," segir í Markaðsvísinum.

„Moody's breytti horfum um lánshæfismat ríkisins úr neikvæðum í stöðugar. Í árlegri skýrslu matsfyrirtækisins um Ísland kemur fram að dregið hafi úr óvissu um endurreisn efnahagslífsins eftir að annarri endurskoðun efnahagsstefnunnar lauk í apríl. Vaxtarhorfur eru þó taldar veikari en áður en að sama skapi eru taldar minni líkur en áður á stórfelldum áföllum.

Staða innstæðubréfa er nú um 77 milljarða kr. sem er ríflega tvöföldun frá þeirri stöðu sem var við síðustu vaxtaákvörðun. Ávöxtunarkrafa ríkisbréfa hefur haldið áfram að lækka og dregið hefur úr verðbólguálagi á skuldabréfamarkaði. Vaxtastigið hefur því skilað auknu aðhaldi og væntingar á markaði eru um að töluvert verði slakað á því.

Horfur í alþjóðlegum efnahagsmálum höfðu batnað nokkuð við síðustu vaxtaákvörðun en síðan þá hafa þær versnað á ný. Þar er um að ræða óvissu um hvort efnahagsaðstoð við Grikkland muni skila tilætluðum árangri og hvort önnur evrulönd þurfi einnig á slíkri aðstoð að halda. Olíuverðshækkun vegna afleiðinga slyssins á Mexíkóflóa hefur einnig áhrif.

Þótt ekki sé um eftirspurnardrifna verðbólgu að ræða um þessar mundir eru líkur á áframhaldandi verðhækkunum vegna kostnaðarþrýstings. Hækkun á launatengdum gjöldum og öðrum sköttum skiptir þar máli. Hættan á verulegum launahækkunum á næstu mánuðum sem ýtt verður út í verðlag og festir verðbógluvæntingar í sessi hlýtur einnig að valda Seðlabankanum áhyggjum.

Líklegast er að áfram verði haldið á sömu braut og því má reikna með 0,5 prósenta lækkun stýrivaxta á morgun, þótt viðbúið sé að ólíkar skoðanir séu á lofti innan peningatefnunefndarinnar líkt og síðast."