Landsbankinn telur launakjör starfsmanna eðlileg

Landsbankinn telur launakjör starfsmanna sinna, sem eru með hærri laun en forsætisráðherra, eðlileg og vísar til eigendastefnu ríkisins sem gefin var út af Bankasýslunni á síðasta ári.

Eins fréttastofa greindi frá í gærkvöldi kemur fram í nýju árshlutauppgjöri Landsbankans, sem er nánast að öllu leyti í eigu ríkisins, að laun, fríðindi og lífeyrisgreiðslur til tuttugu stjórnenda bankans nemi að meðaltali 950 þúsund krónum á mánuði.

Í nýlegum lögum um kjararáð er kveðið á um að föst laun fyrir dagvinnu, annarra en forseta Íslands, verði ekki hærri en föst laun forsætisráðherra, þau eru 935 þúsund krónur á mánuði. Tuttugu stjórnendur ríkisbankans Landsbankans eru því á hærri launum en forsætisráðherra.

Þegar fréttastofa óskaði eftir skýringum á þessu í morgun frá Landsbankanum, fengust þau svör að bankinn teldi þessi laun eðlileg. Þau væru jafnframt í samræmi við tilmæli sem kæmu fram í eigendastefnu ríkisins sem Bankasýsla ríkisins hefði mótað.

Í eigendastefnu ríkisins vegna eignarhalds á fjármálafyrirtækjum segir að opinber fjármálafyrirtæki, eins og Landsbankinn, skuli tileinka sér hófsemi þegar kemur að launum. Með þessu sé átt við að laun stjórnenda eigi að standast samanburð á markaðnum, en séu ekki leiðandi. Þetta er hins svegar ekki útskýrt frekar í eigendastefnunni og ekki er vikið að fjárhæðum.