Besta ár Actavis - ætla að ráða 60-100 nýja starfsmenn á Íslandi

Claudio Albrecht, forstjóri Actavis, segir að milli sextíu og hundrað nýir starfsmenn verði ráðnir til starfa hjá Actavis á Íslandi á næstunni. Þá segir hann árið 2010 vera besta rekstrarár í sögu fyrirtækisins.

Dr. Claudio Albrecht, fyrrum forstjóri samheitalyfjafyrirtækisins Ratiopharm, tók við forstjórastólnum hjá Actavis í júní, en hann á að baki meira en 20 ár í samheitalyfjageiranum. Albrecht er 51 árs, austurrískur ríkisborgari með doktorsgráðu í lögfræði.

„Þetta ár hefur gengið mjög vel. Við fjölguðum starfsmönnum um um það bil 10% á þessu ári þegar við jukum framleiðslugetuna hérna. Við erum að fara að ráða 60-100 manns í viðbót," segir Albrecht.

Höfuðstöðvar fyrirtækisins verða í framtíðinni staðsettar í Sviss og munu fimmtán starfsmenn flytjast héðan þangað. Þess fyrir utan verður starfseminni haldið óbreyttri hér á landi. „Þetta er íslenskt fyrirtæki og við verðum áfram á Íslandi," segir Albrecht. Hann segir þetta ár hafi verið afar gott fyrir Actavis. Rekstrartölur liggja þó ekki fyrir. „Já, þetta er besta árið hingað til og við vonum að við munum vaxa jafnvel enn meira á næstu árum. Við höfum miklar væntingar núna."

Framkvæmdastjórn Evrópusambandsins mun að sögn Albrechts tilkynna formlega um samþykki sitt fyrir fjárhagslegri endurskipulagningu Actavis og verður ný stjórn félagsins skipuð í kjölfarið. Eins og fram hefur komið í fréttum verður Björgólfur Thor Björgólfsson áfram með fulltrúa í nýrri stjórn félagsins, eftir endurskipulagningu þess.