Eva Joly fær engar starfslokagreiðslur

Ólafur Þór Hauksson, sérstakur saksóknari, sagði á blaðamannafundi sem lauk fyrir stundu að Eva Joly, ráðgjafi embættisins, sem hefur nú lokið störfum fái engar sérstakar starfslokagreiðslur. Hún hafi einungis fengið greidd laun fyrir þá daga sem hún hefur starfað fyrir embættið.

Eva Joly hefur komið 18 ferðir til Íslands vegna vinnunnar fyrir sérstakan saksóknara og hefur jafnan dvalið hér í fjóra daga í senn. Joly segir að hún muni sakna Íslands og samstarfsins við Ólaf Þór.

Ólafur Þór sagði á blaðmannafundinum að aðkoma Evu Joly að rannsókninni hafi verið þýðingarmikil fyrir rannsóknina. Hún hafi komið á sambandi milli Serious Fraud Office í Bretlandi og embættis sérstaks saksóknara. Ólafur segir að fundur með forstjóra SFO í Bretlandi og Evu Joly hafi markað upphaf að samstarfi sem í dag sé mjög virkt.

Þá hafi Eva Joly unnið að því að styrkja samband milli yfirvalda á Íslandi og í Lúxemborg og gefið ábendingar um atriði sem varði gerð réttarbeiðna. Hún hafi jafnframt bent embættinu á sérfræðinga sem nú starfi við rannsókn á aðkomu endurskoðenda. Fyrst og fremst hafi Eva Joly miðlað þekkingu á rannsóknum stórra efnahagsbrota sem hafi nýst vel.