IceCapital dæmt til að greiða Arion 3,5 milljarða

Héraðsdómur Reykjavíkur dæmdi í gær eignarhaldsfélagið IceCapital til að greiða Arion banka tæpa 3,5 milljarða króna ásamt dráttarvöxtum frá 2. febrúar 2009.

Málið snýst um lán sem Sund fékk árið 2006 hjá Kaupþingi, sem Arion banki er reistur á, að andvirði 3 milljarðar króna. Gjalddagi lánsins var í febrúar 2009 og eru áfallnir vextir um 465 milljónir króna. Lánið var veitt til fjármögnunar á hlut í Kaupþingi. Það var ekki greitt til baka eftir gjalddaga.

Fram kom í máli lögmanna IceCapital fyrir dómi að forsvarsmenn félagsins teldu sig óbundna af lánasamningnum þar sem stefnandi hafi misnotað viðskiptavini sína til að hafa áhrif á verðmyndun hluta í bankanum og lánið hafi verið veitt til að blekkja stefnda. Þá töldu lögmenn IceCapital að forsendur fyrir lántökunni hafi brostið við fall Kaupþings í byrjun októbermánaðar 2008.

Héraðsdómur kemst að þeirri niðurstöðu að IceCapital sé bundinn af samningnum þrátt fyrir fall Kaupþings og ásakanir um að stjórnendur bankans hafi unnið gegn hluthöfum í aðdraganda falls bankans. Þær ásakanir séu ósannaðar. Almennt fylgi því áhætta að eiga viðskipti með hlutabréf. Það sé aldrei hægt að treysta því að þau einungis hækki í verði og skili hagnaði eins og IceCapital geri í málatilbúnaði sínum.