Tekjur ríkustu fjölskyldnanna dragast saman

Tekjur tekjuhæstu fjölskyldna landsins hafa dregist saman um rúman helming frá árinu 2007, en þær eru enn næstum tvöfallt hærri en þær voru árið 2000.

Í fréttabréfi Þjóðmálastofnunar Háskóla Íslands er farið yfir tekjur 100 tekjuhæstu einstaklinga landsins og er stuðst við samantekt tímaritsins Frjálsrar verslunar, nokkuð mörg ár aftur í tímann.

Sjá má að þeir tekjuhæstu á árunum 2000 til 2002 voru með um tvær og hálfa og þrjár milljónir króna í mánaðartekjur. Tekjurnar voru svo komnar upp í rúmar 11 milljónir árið 2007. Í fyrra námu þessar tekjur hins vegar rúmlega fimm milljónum.

Hækkunin hjá þeim sem mest fengu í launaumslagið á uppgangsárunum hefur því að mestu leyti gengið til baka. Tekjur hinna launahæstu eru hins vegar enn á pari við það sem þær voru árin 2002 til 2004.

Bent er á að ekki litið til fjármagnstekna fólks við útreikningana. Enn fremur að hinir tekjuhæstu í samfélaginu séu alla jafna með miklar fjármagnstekjur, en ekki sé gerð grein fyrir þeim í Frjálsri verslun.

Þjóðmálastofnun bendir á að árið 2007 hafi 600 tekjuhæstu fjölskyldur landsins, um eitt prósent landsmanna, að jafnaði haft átján milljónir króna í mánaðartekjur. Þá eru taldar með atvinnutekjur, fjármagnstekjur og lífeyristekjur.