Segir umsátur ríkja um heimilin

Það ríkir umsátur um heimilin í landinu, sagði Sigmundur Davíð Gunnlaugsson, formaður Framsóknarflokksins, í eldhúsdagsumræðum á Alþingi í kvöld. Hann sagði að í stað þess að slá skjaldborg um heimilin hefði verið slegin skjaldborg um kröfuhafa.

Sigmundur Davíð sagði að ekkert hafi verið gert sem telja megi almennar aðgerðir til að fást við skuldavanda heimila eftir ríkisstjórnarskipti í fyrra. Slíkar aðgerðir hafi þó verið það eina sem gæti talist raunhæfur möguleiki í stöðunni. Benti Sigmundur á að framsóknarmenn hafi lagt fram tillögu um 20% skuldaleiðréttingu.

Sigmundur Davíð sagði að lítið traust ríkti í garð stjórnmálanna. Ástæðan væri sú að á erfiðleikatímum væru stjórnmálin ekki að skila af sér lausnum. „Þau eru ekki að framkvæma í samræmi við tilefnið," sagði Sigmundur Davíð.