Metan lán sett á markað

Landsbankinn hefur sett á markað Metan-lán sem ætluð eru þeim sem vilja breyta bíl sínum í metan bíl. Lánin eru hluti af þeirri hugmyndafræði bankans að marka sér skýrari umhverfisstefnu en áður.

Metan-lán verða veitt þeim sem vilja breyta bíl sínum þannig að hann gangi fyrir metaneldsneyti til jafns við bensín. Hægt er að breyta öllum bensínbílum með beinni innspýtingu og flestum gerðum dísilbíla. Kostnaður við uppfærslu ökutækja nemur á bilinu 350 - 500.000 krónum.

Landsbankinn segir að talið sé að lækka megi eldsneytiskostnað um allt að 45% á ári með því að notast við metan. Þá er ónefndur ávinningur samfélagsins vegna notkunar umhverfisvæns orkugjafa en metan er allt í senn öruggt, umhverfisvænt og hagkvæmt eldsneyti.

Í tilkynningu frá Landsbankanum segja að metan-lán séu veitt að undangengnu greiðslumati og gegn framvísun reikninga fyrir breytingunni. Lánin séu veitt til allt að 48 mánaða og beri 9,15% vexti.

Allar nánari upplýsingar um Metan-lán má finna á vef Landsbankans og upplýsingar um notkun metans, framleiðslu þess og breytingu á bílum má finna á metan.is.