Skuldir sveitarfélaga takmarkist við 150% af tekjum

Samráðsnefnd ríkis og sveitarfélaga leggur til í nýrri skýrslu að sveitarfélögum verði skylt að takmarka skuldir og skuldbindingar samstæðu við 150% af skilgreindum tekjum samstæðu. Einnig er lagt til að jafnvægi verði milli samanlagðra rekstrartekna og rekstrargjalda á hverju þriggja ára tímabili.

Fjallað er um málið á vefsíðu stjórnarráðsins. Þar segir að verkefni samráðsnefndar ríkis og sveitarfélaga um efnahagsmál hefur einkum verið að rannsaka árangur gildandi fjármálareglna samkvæmt sveitarstjórnarlögum og gera tillögur til úrbóta, að leggja fram tillögur að hagstjórnarsamningi ríkis og sveitarfélaga og í þriðja lagi að taka saman gögn um fjárhag sveitarfélaga fyrir Alþjóðagjaldeyrissjóðinn við gerð þjóðhagsáætlunar til ársins 2013.

Auk tillagnanna er í skýrslu nefndarinnar sett fram greining á fjármálum sveitarfélaga í þjóðhagslegu samhengi. Þá eru í viðauka settar fram tillögur um fjárhagsáætlanir og breytingar á þeim, um útgjöld og meðferð fjármuna og fasteigna, um tryggingar og ábyrgðir, um regluleg skil á upplýsingum, um eftirlit með fjármálum sveitarfélaga, samstarfsráð og mat á fjárhagslegum áhrifum stjórnvaldsákvarðana og lagasetninga á rekstur sveitarfélaga.

Í forsendum fyrir skuldareglum kemur fram að skilgreining á skuldum sé mjög víðtæk: Langtímaskuldir, fjármögnunarleigusamningar, rekstrarleigusamningar, lífeyrisskuldbindingar eða aðrar skuldbindingar og allar skammtímaskuldir. Ef sveitarfélag er í samstæðurekstri með öðrum sveitarfélögum þá skal telja til skulda ábyrgð sveitarfélagsins á skuldum samlagsfélagsins eftir eignarhluta þess.