Almenningi hleypt inn á skuldabréfamarkað

Kauphöllin á Íslandi (Nasdaq OMX) vinnur að mótun markaðar þar sem almennir fjárfestar geta átt viðskipti með skuldabréf fyrirtækja. Fram til þessa hafa fyrirtæki eingöngu selt fagfjárfestum skuldabréf sín.

Viðskipti með skuldabréf með þessum hætti hafa verið að ryðja sér til rúms í erlendum kauphöllum, svo sem í Svíþjóð, Bretlandi og í Singapúr.

Áhugi á þeim enda ákjósanlegur kostur vegna sveiflna á hlutabréfamarkaði og áhættufælni í kjölfar fjármálakreppunnar. Hér yrði sala á skuldabréfum fyrir­tækja til einstaklinga nýlunda. Skuldabréfaútgáfa með þessum hætti er talin geta brúað bilið fyrir lítil og meðalstór fyrir­tæki á meðan tiltrú er enn lítil á hlutabréfamarkað og þannig fjölgað fjárfestingartækifærum.

Skuldabréfaútgáfur sem þessar gætu verið talsvert minni en þær sem seldar eru fagfjárfestum, nokkuð hundruð milljónir króna í stað milljarða. Þá geta almennir fjárfestar keypt bréfin með sambærilegum hætti og hlutabréf, eða frá fáum tugum þúsundum.

„Við erum að skoða þessa hugmynd," segir Magnús Harðarson, forstöðumaður viðskiptasviðs Kaup­hallar­innar. „Við höfum verið að móta hugmyndir um uppbyggingu verðbréfamarkaðarins í víðara samhengi. Þetta er angi af því sem við munum fara yfir með fyrirtækjum á næstunni. Við höfum talað fyrir því að auka tækifæri almennings til fjárfestinga í hlutabréfum og teljum að hann ætti að njóta góðs af fjölbreyttari fjárfestingarkostum, ekki síður en fagfjárfestar. Skuldabréfamarkaður af þessu tagi passar vel inn í þá hugmyndafræði. Að sama skapi teljum við að þetta óplægðan akur fyrir fyrirtækin, tækifæri sem þau ættu að skoða alvarlega," segir hann og mælir með því að fyrirtæki skoði þennan fjármögnunarmöguleika vandlega. „Við erum þess fullviss að skuldabréf af þessu tagi muni líta dagsins ljós."

Hann bendir á að útgáfa skuldabréfa geti verið góð og tiltölulega kostnaðarlítil leið fyrir fyrirtæki til að afla fjár þar sem mikill munur er á útláns- og innlánsvöxtum. „Skuldabréf sem sniðin eru sérstaklega fyrir almenna fjárfesta veita fyrirtækjum aðgang að miklum fjölda fjárfesta sem þeir hefðu annars ekki aðgang að, hópi sem öllu jafna vill lágmarka áhættu sína við fjárfestingar. Fjármögnun af þessu tagi getur hentað fyrirtækjum af ýmsum stærðum og raunar verið áfangi fyrir fyrirtæki sem hafa síðar hug á að skrá hlutabréf sín," segir Magnús.