Hækkun verðtryggðra lána ekki minni síðan 2003

Miðað við verðbólgumælinguna nú vegur hækkun á höfuðstól verðtryggðra lána vegna verðbóta 2,6% yfir árið 2010. Hefur hækkunin á þann mælikvarða ekki verið minni frá því árið 2003.

Þetta kemur fram í Morgunkorni greiningar Íslandsbanka þar sem fjallað er um minnkun verðbólgu niður í 2,6% í nóvember. Vísitala neysluverðs í nóvember gildir til verðtryggingar 1. janúar á næsta ári.

Í Morgunkorninu segir að sem dæmi má nefna að höfuðstóll 10 milljóna kr. verðtryggðs láns hækkar á yfirstandandi ári um 260 þúsund kr., ef horft er fram hjá afborgunum af höfuðstólnum.

Í fyrra nam hækkun á samsvarandi láni hins vegar 860 þúsund kr. og yfir árið 2008 hækkaði slíkt lán um 1.7 milljónir kr.

Hjöðnun verðbólgunnar er því harla góðar fréttir fyrir skuldsett heimili, og góðar líkur eru á að höfuðstóll verðtryggðra lána muni áfram hækka hóflega fram eftir næsta ári.

Seðlabankinn mun væntanlega líkt og fleiri gleðjast yfir mælingunni, enda er verðbólga nú hin minnsta síðan vorið 2004 og liggur við 2,5% markmið bankans. Niðurstaðan eykur því líkur á vaxtalækkun þann 8. desember næstkomandi, enda nefndi peningastefnunefnd bankans hjaðnandi verðbólgu sem forsendu fyrir því að lækka vexti frekar.

„Við teljum að áfram verði verðbólguþrýstingur hóflegur og líklegt er að verðbólga muni sveiflast um markmið Seðlabankans langt fram eftir næsta ári, að því gefnu að krónan gefi ekki verulega eftir að nýju og að þeirri kjarasamningalotu sem nú er verið að ýta úr vör ljúki með tiltölulega hóflegri hækkun launa. Spáum við 2,3% hækkun á vísitölu neysluverðs yfir næsta ár," segir í Morgunkorninu.