Stórfyrirtækin í tapi

Helmingur stærstu fyrirtækja landsins var rekinn með tapi á síðasta ári. Þriðjungur hefur ekki skilað ársreikningi til ríkisskattstjóra. Þetta kemur fram í gögnum sem CreditInfo aflaði fyrir fréttastofuna.

Meðal þeirra félaga sem rekin voru með tapi í fyrra eru Actavis, Alcoa, Bakkavör, Byko, Hagar, Hekla, Húsasmiðjan, Icelandair Group, Marel, Síminn og Teymi.

Fimm af stærstu fyrirtækjunum eru með neikvætt eigið fé, skulda meira en þau eiga.

Teknar voru saman upplýsingar um 77 stærstu fyrirtæki landsins en af þeim hafa 24 ekki enn skilað inn ársreikningi fyrir árið 2009. Af þeim sem skiluðu ársreikningi greiddu 9 út arð á síðasta ári.

Alcan, Alfesca, Ísfélag Vestmannaeyja, Íslenskir aðalverktakar, Landsbankinn, Lyfja, N1, Olís og Ölgerðin eru meðal þeirra sem ekki hafa skilað ársreikningi, en skilafrestur rann út þann 31. ágúst síðastliðinn.

Í samtali við fréttastofu í dag sagði Skúli Eggert Þórðarson, ríkisskattstjóri að til framtíðar væri eina raunhæfa lausnin við þessum vanda að slíta þeim félögum sem ekki standi skil á ársreikningum og flytja þau yfir í fulla ábyrgð eigenda. Viðurlögin sem nú eru í gildi, sektir upp á 250 þúsund krónur, séu ekki nægjanlega áhrifamikil og því verði breytt. Hann sagði það ekki ganga að félög kæmust upp með að skila ekki ársreikningi mánuðum og jafnvel árum saman.