Glitnir greiðir kröfuhöfum 250 milljarða á næsta ári

Skilanefnd Glitnis mun greiða kröfuhöfum bankans um 250 milljarða kr. á næsta ári.. Þetta kemur fram í samtali Bloomberg fréttaveitunnar við Árna Tómasson formann skilanefndarinnar.

„Við liggjum nú inni með um 250 milljarða króna (2,14 milljarða dollara)," segir Árni Tómasson í samtalinu. „Það kæmi mér ekki á óvart að þetta sé sú upphæð sem bankinn muni greiða út. Ég tel að meira fé verði komið í kassann á seinnihluta 2011. Við vonumst til að hefja greiðslurnar þá."

Fram kemur í umfjöllun Bloomberg að Glitnir sé nú að reyna að ganga frá kröfum sem nema 15 faldri þessari upphæð. Alls nema kröfurnar á hendur bönkunum þremur, Glitni, Landsbankanum og Kaupþingi um 86 milljörðum dollara eða yfir 10.000 milljörðum kr. en til samanburðar er landsframleiðsla Íslands 12 milljarðar dollara eða rúmlega 1.400 milljarðar kr.

Árni segir að sú upphæð sem skilanefndin nái inn í búið verði skipt upp á milli kröfuhafana eftir ákveðnum hlutföllum. „Þeir munu svo skipta þeim upphæðum fyrir hluti í bankanum, eða að minnsta kosti hluta þess sem þeir eiga inni," segir Árni. „Kröfuhafarnir verða þá eigendur Glitnis og við getum dregið okkur í hlé frá okkar störfum."