Verðbólgan mælist 2,5%, verðbólgumarkmiðinu náð

Ársverðbólgan mælist nú 2,5% sem er verðbólgumarkmið Seðlabankans. Hún lækkar um 0,1 prósentustig frá í nóvember.

Þetta kemru fram á vefsíðu Hagstofunnar. Þar segir að vísitala neysluverðs miðuð við verðlag í desember er 366,7 stig og hækkar um 0,33% frá fyrra mánuði. Vísitala neysluverðs án húsnæðis er 349,5 stig og hækkar um 0,43% frá nóvember.

Verð á bensíni og olíum hækkaði um 4,0% (vísitöluáhrif 0,22%), Flugfargjöld til útlanda hækkuðu um 15,5% (0,12%).

Síðastliðna tólf mánuði hefur vísitala neysluverðs hækkað um 2,5% en vísitala neysluverðs án húsnæðis um 3,5%.

Undanfarna þrjá mánuði hefur vísitala neysluverðs hækkað um 1,1% sem jafngildir 4,6% verðbólgu á ári (5,4% verðbólga fyrir vísitöluna án húsnæðis).

Meðalvísitala neysluverðs árið 2010 var 363,2 stig, 5,4% hærri en meðalvísitalan 2009. Samsvarandi breyting var 12,0% árið 2009 og 12,4% árið 2008.

Meðalvísitala neysluverðs án húsnæðis árið 2010 var 345,5 stig, 7,5% hærri en meðalvísitalan 2009. Samsvarandi breyting var 16,1% árið 2009 og 12,2% árið 2008.