HS orka afhendi Norðuráli 250 MW

„Við erum í óformlegum viðræðum. Meðan mál eru enn fyrir gerðardómi er þetta ekki á formlegum nótum," segir Júlíus Jónsson, forstjóri HS orku um viðræður við Norðurál um afhendingu orku til álvers Norðuráls í Helguvík.

Júlíus gefur ekki upp hvaða verðhugmyndir séu uppi en segir að menn ræði um afhendingu á 250 megavöttum af raforku til álversins.

Norðurál og HS orka hafa tekist á fyrir gerðardómi í Svíþjóð. Norðurál taldi að HS orka hefði ekki staðið við gerðan samning um afhendingu orku fyrir álverið fyrirhugaða í Helguvík. Málinu er ólokið.

HS orka vill virkja frekar við Reykjanesvirkjun. Menn eru bjartsýnir um að þar sé meiri orku að finna en áður hefði verið talið. Niðurstöður nýlegra rannsókna hafa verið sendar Orkustofnun, og væntir HS orka þess að virkjanaleyfi fáist í framhaldinu.