Íslendingar eiga 1800 milljarða í lífeyrissjóðunum

Uppbygging lífeyrissjóða er eitt af því sem best hefur tekist hjá Íslendingum undanfarin ár og áratugi, segir Vilhjálmur Egilsson, framkvæmdastjóri Samtaka atvinnulífsins, í grein í Fréttablaðinu í dag.

Vilhjálmur segir að í sjóðunum séu nú samtals rúmlega 1.800 milljarðar króna og fáar þjóðir hafi byggt upp sambærilegan sparnað til þess að standa undir lífeyrisgreiðslum í framtíðinni. Einungis Holland og Sviss séu sambærileg við Ísland en þessi þrjú ríki eiga sparnað í lífeyrissjóðum sem nemi 120-130% af landsframleiðslu en önnur ríki standi þeim langt að baki.

Vilhjálmur segir að umhugsunarvert sé að bera saman stöðu Íslands og Grikklands. Grikkland engist í djúpri kreppu meðal annars vegna ákvarðana skammsýnna og tækifærissinnaðra stjórnmálamanna fyrr á árum sem lögleiddu lífeyriskerfi á kostnað skattgreiðenda sem engin leið sé að standa undir, en Grikkir eigi enga lífeyrissjóði.