Tugmilljarða lán Ólafs fæst ekki endurgreitt

Tuttugu og fimm milljarða króna lán sem Egla Invest BV, félag í eigu Ólafs Ólafssonar, fékk að láni frá Glitni og Kaupþingi, verður aldrei greitt til baka. Þetta kemur fram í Viðskiptablaðinu á morgun.

Á vef viðskiptablaðsins segir að Glitnir og Kaupþing hafi lánað Eglu Invest 25 milljarða króna á árinu 2008 gegn veðum í bréfum Ólafs Ólafssonar í Kaupþingi. Viðskiptablaðið segir að peningarnir hafi verið lánaðir á árinu 2008 til að borga upp lán hjá Citibank sem sætti veðkalli.

Blaðið segir að það lán hafi verið veitt til Ólafs til að endurfjármagna hlutabréfaeign hans í Kaupþingi. Einu veðin sem íslensku bankarnir hafi tekið hafi verið í bréfunum sjálfum. Þar sem þau eru nú verðlaus muni skuldin, sem liggur hjá skilanefndum bankanna, aldrei verða greidd.

Ólafur Ólafsson er yfirleitt kenndur við Samskip. Hann var einn af aðaleigendum Kaupþings.