Vísitala framleiðsluverðs lækkaði um 0,9%

Vísitala framleiðsluverðs í ágúst 2010 var 184,9 stig og lækkaði um 0,9% frá júlí 2010.

Vísitala framleiðsluverðs fyrir sjávarafurðir var 213,9 stig, sem er lækkun um 3,1% (vísitöluáhrif -1,1%) frá fyrri mánuði og vísitala fyrir stóriðju var 213,4 stig, lækkaði um 0,5% (-0,2%). Vísitalan fyrir matvæli lækkaði um 0,2% og vísitala fyrir annan iðnað hækkaði um 3,1% (0,4%).

Þetta kemur fram á vefsíðu Hagstofunnar. Þar segir að vísitala framleiðsluverðs fyrir vörur sem framleiddar voru og seldar innanlands hækkaði um 1,3% (0,3%) milli mánaða en vísitala fyrir útfluttar afurðir lækkaði um 1,5% (-1,2%).

Miðað við ágúst 2009 hefur vísitala framleiðsluverðs hækkað um 1,8% en verðvísitala sjávarafurða lækkað um 4,8%. Á sama tíma hefur verð á afurðum stóriðju hækkað um 11,5% en matvælaverð hefur hækkað um 1,1%.