Einn virtasti hagfræðingur heims telur framtíð evru í uppnámi

Joseph Stiglitz, sem er einn virtasti hagfræðingur í heiminum, telur framtíð evrunnar sem sjálfstæðs gjaldmiðils í uppnámi og að hagkerfi ríkja Evrópu verði lengi að koma sér upp úr kreppunni.

Joseph Stiglitz er nóbelsverðlaunahafi í hagfræði en hann starfaði um tíma sem aðalhagfræðingur Alþjóðabankans. Í breska dagblaðinu Telegraph er umfjöllun um endurútgáfu bókar hans Freefall sem fjallar um kreppuna sem hófst með undirmálslánum í Bandaríkjunum. Stiglitz segir að evran sem gjaldmiðill þjóni ekki hagsmunum ríkja sem glíma við viðskiptahalla og skuldir. Stiglitz segir að þjóðir sem deili gjaldmiðli gefi frá sér sveigjanleika til að takast á við efnahagslægðir, sveigjanleika sem fylgja sjálfstæðum myntum.

Ummæli Stiglitz, sem var efnahagsráðgjafi Bill Clintons bandaríkjaforseta, eru athyglisverð vegna þess að Steingrímur J. Sigfússon, fjármálaráðherra, hefur haldið því fram að íslenska krónan hafi hjálpað Íslendingum mikið að komast út úr kreppunni. Þá hafa fleiri tekið þessi rök á lofti og þá sérstaklega andstæðingar aðildar Íslands að Evrópusambandinu. Á móti kemur hafa aðrir bent á að tímabundinn ávinningur þess að hafa sjálfstæða litla mynt í efnahagslægð sé ekki jafn mikilvægur og langtímaávinningur þess að hafa stöðugleika í gjaldmiðilsmálum, sem litlir sjálfstæðir gjaldmiðlar eins og krónan hafi ekki.

Stiglitz segir í bókinni að vegna stöðu ríkja eins og Írlands, Portúgals og Grikklands verði þrýstingur á evruna ef til vill meiri en evrusvæðið þolir. Stiglitz telur það síðan koma til greina að Þýskaland segi sig úr Myntbandalagi Evrópu og taki upp þýska markið að nýju. Stiglitz segir að það hefði í för með sér að evran myndi lækka til samræmis við þarfir þeirra ríkja sem eru með stóran viðskiptahalla og veika samkeppnisstöðu.