Útboð Strætó: Gengið til samninga við lægstbjóðendur

Verðtilboð í akstur strætisvagna fyrir Strætó bs. voru opnuð 10. mars síðastliðinn Alls bárust tilboð frá sjö aðilum og ákvað stjórn Strætó bs. á fundi sínum viku seinna að ganga til samninga við fyrirtækin Hagvagna og Kynnisferðir. Útboðið er til fjögurra ára og hefst akstur í lok ágúst 2010.

Andvirði samningsins er 987 milljónir kr. á ári eða tæpir fjórir milljarðar. Um er að ræða akstur 35 strætisvagna og 119 þúsund aksturstíma á ári hverju.

Reynir Jónsson, framkvæmdastjóri Strætó bs., segir að kreppan hafi valdíð gríðarlegum hækkunum á öllum aðföngum fyrirtækisins. Það sé því ánægjuleg niðurstaða að fá hagstæð boð þrátt fyrir auknar kröfur um þjónustu og gæði.

„Öllum aðalmarkmiðum útboðsins var náð og stjórnin gerði skynsamlega í því að setja aksturinn í útboð á þessum tímapunkti þrátt fyrir miklar efasemdaraddir um að slíkt væri heppilegt á þessum tíma," segir Jórunn Frímannsdóttir, formaður stjórnar Strætó bs í tilkynningu til fjölmiðla vegna málsins.