Seðlabankastjóri sótti fund fjárhagsnefndar AGS

Í tilkynningu segir að fulltrúi kjördæmis Norðurlanda og Eystrasaltslanda í fjárhagsnefnd AGS var að þessu sinni seðlabankastjóri í Finnlandi, Erkki Liikanen. Yfirlýsing kjördæmisins í fjárhagsnefnd AGS er birt í heild sinni á vefsíðum Seðlabanka Íslands og má nálgast hér:

Yfirlýsing kjördæmis Norðurlanda og Eystrasaltslanda Vor 2010.pdf

Í tengslum við vorfund fjárhagsnefndar AGS var haldin sameiginleg ráðstefna Alþjóðagreiðslubankans og AGS um mótun framtíðarskipan regluverks og eftirlits á fjármálamarkaði og samspil peningastefnu og fjármálastöðugleika. Már Guðmundsson seðlabankastjóri hélt erindi á ráðstefnunni er bar heitið: „The fault-lines in cross-border banking: lessons from the Iceland case". Skjal sem notað var til stuðnings í flutningi erindisins má nálgast hér:

Kynningarefni með erindi seðlabankastjóra.ppt

Seðlabankastjóri átti auk þess fundi, bæði í Washington DC og New York, með fjármálastofnunum, matsfyrirtækjum og stjórnendum og starfsfólki Alþjóðagjaldeyrissjóðsins. Einnig átti seðlabankastjóri fund með dr. Joseph Stiglitz, prófessor í hagfræði við Columbia-háskóla.