Pétur Blöndal undrast álit ESA

Álit Eftirlitsstofnunar EFTA um að Íslendingum beri að greiða Icesave er afskaplega undarlegt, segir Pétur Blöndal þingmaður Sjálfstæðisflokksins. Hann segist ekki geta fallist á það. Honum sýnist sem ESA taki ekki inn í dæmið tvo veigamikil atriði

Í fyrsta lagi að hér hafi orðið kerfishrun. „Innlánstryggingakerfið í Evrópu ræður ekki við kerfishrun nema um sé að ræða 100% tryggingu sem er hvergi til staðar. Ég fullyrði að ekkert land í Evrópu myndi ráða við kerfishrun, hvorki Bretland, né Holland og ekki einu sinni Þýskaland," segir Pétur.

Í öðru lagi hafi Ísland verið búið að innleiða reglur Evrópusambandsins um innlánstryggingar með algerlega fullnægjandi hætti, þannig að ekki hafi verið kvartað undan því hjá Evrópusambandinu. „Á því kerfi átti ekki að vera ríkisábyrgð enda hefði það rekist á við kröfur Evrópusambandsins um að ekki sé verið að mismuna fyrirtækjum eftir löndum," segir Pétur og bendir á að ríkisábyrgð í einu landi en ekki öðru sé mismunun.

Pétur bendir á að þó að Evrópusambandið sé búið að taka upp nýja tilskipun sem ekki hefur verið innleidd á EES svæðinu að þá hafi ekki verið ríkisábyrgð í þeirri tilskipun sem Íslendingar innleiddu og ber að hlíta.