Lánshæfiseinkunn Landsvirkjunar hækkuð

Matsfyrirtækið Standard og Poor's hefur hækkað lánshæfiseinkunn Landsvirkjunar úr BB með neikvæðum horfum í BB+ með neikvæðum horfum.

Landsvirkjun vitnar í tilkynningu frá Standard og Poor's þar sem fram kom að hækkun lánshæfiseinkunnar Landsvirkjunar stafi einkum af breyttum áherslum í rekstri fyrirtækisins og því að markvisst sé unnið að því að draga úr áhættu í rekstri.

„Í tilkynningu Standard og Poor's segir að rekstraráhætta Landsvirkjunar hafi minnkað með því að dregið hafi verið úr tengingu tekna við álverð, sem dragi úr áhættu í rekstri," segir í tilkynningu frá Landsvirkjun.

„Lausafjárstaða fyrirtækisins hafi styrkst með auknu aðgengi að fjármagni og hefur ekki lengur áhrif á lánshæfiseinkunn Landsvirkjunar. Afkoma á fyrri hluta ársins 2010 gefur til kynna að búast megi við að afkoma fyrirtækisins batni enn frekar á komandi árum. Þá telur S&P það jákvæða þróun að Landsvirkjun leggi nú aukna áherslu á arðsemi í stefnu sinni."

Þá bendir Landsvirkjun á að skýringin á því að einkunn Landsvirkjunar sé með neikvæðum horfum sé sú að lánshæfismat íslenska ríkisins sé einnig með neikvæðum horfum.