Þröstur Sigurðsson til Capacent

Þröstur Sigurðsson hefur gengið til liðs við Capacent á Íslandi. Hann er reynslumikill ráðgjafi og hefur m.a. yfirgripsmikla þekkingu á rekstri sveitarfélaga, orkumálum og starfsemi fasteignafélaga, segir í tilkynningu.

Þröstur hóf sinn feril sem ráðgjafi árið 1993, þegar hann stofnaði ráðgjafarfyrirtækið Rekstur og Ráðgjöf. Hann stýrði því þar til hann tók við sem sviðsstjóri fjármálaráðgjafar PriceWaterhouseCoopers árið 2000. Ráðgjafasvið þess félags breyttist síðar í ParX, og stýrði Þröstur fjármálaráðgjöf þess fyrirtækis til ársins 2007. Þá hélt hann til starfa hjá Landic Properties, þar sem hann var framkvæmdastjóri M&A.

Í byrjun síðasta árs stofnaði Þröstur ráðgjafarfyrirtækið Melland Partners, sem sérhæfði sig í ráðgjöf á sviði orkumála, starfsemi fasteignafélaga og opinbers rekstrar. Þröstur hefur á undanförnum árum unnið margvíslegar útttektir á fjármálum sveitarfélaga og hagkvæmni þess að sameina sveitarfélög. Þröstur mun leiða uppbyggingu á þjónustuframboði Capacent á sviði ráðgjafar í fjármálum.