Landinn orðinn léttari í lundu

Nokkuð léttara var yfir landanum nú í nóvember en mánuðinn á undan ef marka má Væntingavísitölu Gallup sem birt var nú í morgun. Þannig hækkaði vísitalan um tæp 19 stig milli mánaða og gekk því sú mikla lækkun sem varð mánuðinn á undan að hluta til baka.

Fjallað erum um málið í Morgunkorni greiningar Íslandsbanka. Þar segir að þessi þróun komi í raun ekki á óvart enda var ólgan afar sýnileg í samfélaginu í október vegna fjárhagslegrar stöðu heimilanna og yfirvofandi niðurskurðar í opinberum rekstri.

Mælist vísitalan nú 50,6 stig en sem kunnugt er mælir vístalan væntingar neytenda til efnahags- og atvinnulífsins en þegar vísitalan er undir 100 stigum eru fleiri neytendur svartsýnir en bjartsýnir.

Allar undirvísitölur Væntingavísitölunnar hækkuðu á milli október og nóvember öfugt við það sem átti sér stað á milli september og október. Þó vegur þessi hækkun ekki upp þá lækkun sem átti sér stað síðast og eiga undirvísitölunnar því þó nokkuð í land með að ná sömu gildum og í september.

Þó er ljóst að þetta bendir til þess að væntingar neytenda til núverandi ástands í efnahags- og atvinnumálum jafnt og ástandsins eftir sex mánuði eru meiri nú en fyrir mánuði síðan. Mest er hækkunin á væntingum til ástandsins í efnahags- og atvinnumálum eftir 6 mánuði sem hækka um tæp 29 stig og mælast nú 77,1 stig.

Mat á núverandi ástandi hækkar mun minna, eða um tæp 4 stig og mælist áfram afar lágt, eða 10,8 stig. Breyttar væntingar til ástandsins í efnahags- og atvinnumálum þjóðarinnar eftir sex mánuði skýrir því hækkun sem varð á Væntingavísitölunni nú.