Ætla í mál vegna mistaka og vanrækslu bankastarfsmanna

Viðskiptavinir Glitnis og Kaupþings ætla í mál við Íslandsbanka og Arion vegna mistaka og vanrækslu bankastarfsmanna. Skaðabótakröfur á hendur Íslandsbanka einum nema fimm og hálfum milljarði króna.

Bankar bjóða flestir upp á einkabankaþjónustu, sem snýr að sérfræðiþjónustu fyrir efnaða viðskiptavini.

Algengt viðmið er að þurfa að eiga yfir 50 milljónir króna.

Nokkrir fyrrverandi viðskiptavina einkabankaþjónustu Glitnis ætla að fara í skaðabótamál við Íslandsbanka vegna mistaka starfsmanna Glitnis, en þeir telja sig hafa orðið fyrir fjárhagstjóni vegna vanrækslu þeirra. Kröfurnar nema samtals um fimm og hálfum milljarði króna.

Eitt mál hefur þegar verið höfðað fyrir Héraðsdómi Reykjavíkur. Í hálfs árs uppgjöri Íslandsbanka segir að bankinn viðurkenni ekki þessar kröfur og muni verjast fyrir dómi. Rökin eru þau að skaðabótakröfurnar snúi að mistökum sem voru gerð fyrir tíð Íslandsbanka. Þau séu því ekki á ábyrgð þess banka á nokkurn hátt.

Það sama er upp á teningnum hjá Arion banka. Nokkrir fyrrverandi viðskiptavina Kaupþings hafa stefnt bankanum og fara fram á skaðabætur vegna vanrækslu starfsmanna, sem valdið hafi þeim fjárhagstjóni. Arion banki telur að heildarlögfræðiáhætta bankans nemi um 1,5 milljarði króna.

Ekki hefur verið tekið tillit til þessa í efnahagsreikningum bankanna tveggja.

Þau svör fengust hjá Íslandsbanka og Arion að það sé ekki í samræmi við reikningsskilavenjur að færa tjón í bækurnar á meðan óvissa ríkir um skaðabótaábyrgð og upphæðir. Þá sé talið ólíklegt að tjónið lendi á nýju bönkunum, þar sem það hafi átt sér stað fyrir stofnun þeirra.

Engin samskonar mál hafa verið höfðuð á hendur Landsbankanum, samkvæmt upplýsingum þaðan, en þó eru fjöldi annarra dómsmála í farvegi þar eins og hjá öllum bönkunum.