Spá yfir 100 milljarða vöruskiptaafgangi

Greining Íslandsbanka býst við að áfram verði myndarlegur afgangur af vöruskiptum við útlönd. Verð helstu útflutningsvara hafi hækkað verulega frá fyrri hluta síðasta árs og horfur séu á að innflutningur neyslu- og fjárfestingarvara verði enn um sinn með minna móti þar til hagkerfið nær sér á strik að nýju.

Greining Íslandsbanka segir í Morgunkorni að líklegt sé að vöruskiptaafgangurinn verði yfir 100 milljarðar króna á yfirstandandi ári, en í fyrra hafi verið 90,3 milljarða króna afgangur af vöruskiptum við útlönd. Í hlutfalli við landsframleiðslu gæti afgangur af vöruskiptum reynst 7 - 8% í ár samanborið við 6% afgang í fyrra.