Gagnaverin samkeppnishæf

Þingmenn Samfylkingarinnar og Vinstri grænna hafa náð samkomulagi um að leggja til veigamiklar breytingar á frumvarpi fjármálaráðherra um virðisaukaskatt. Breytingarnar eru forsenda þess að gagnaver hér á landi verði samkeppnishæf við gagnaver í ríkjum Evrópusambandsins.

„Þetta er mjög gott fyrir okkur, og gerir okkur kleift að halda áfram á þeirri braut sem við erum á,“ segir Jón Viggó Gunnarsson, framkvæmdastjóri gagnaversins Thor Data Center.

„Ef Alþingi samþykkir þessar breytingar er það niðurstaða sem okkar kúnnar hafa beðið eftir lengi,“ segir Jón.

Gagnaverin lögðu til þrenns konar breytingar á frumvarpi fjármálaráðherra um breytingu á lögum um virðisaukaskatt. Fjallað var um málið í efnahags- og skattanefnd í gær.

Á fundi nefndarinnar var samþykkt að leggja til þá breytingu á frumvarpinu að erlendir viðskiptavinir gagnavera þurfi ekki að greiða virðisaukaskatt af tækjabúnaði til að nota í gagnaverum, segir Magnús Orri Schram, fulltrúi Samfylkingarinnar í efnahags- og skattanefnd.

Sú breyting ein og sér hefði ekki dugað til að gera gagnaver hér á landi samkeppnishæf, segir Jón hjá Thor Data Center.

Heimildir Fréttablaðsins herma að þingmenn Vinstri grænna í efnahags- og skattanefnd hafi verið andvígir því að leggja til frekari breytingar á frumvarpinu. Þingmenn annarra flokka vildu hins vegar ganga lengra.

Á tíunda tímanum í gærkvöldi náðist að lokum samkomulag milli þingmanna Samfylkingarinnar og Vinstri grænna. Fulltrúar flokkanna í efnahags- og skattanefnd hafa ákveðið að flytja tillögu þegar Alþingi fjallar um málið, sem verður líklega í dag. Þeir munu leggja til að erlendir viðskiptavinir gagnaveranna þurfi ekki að greiða virðisaukaskatt af þjónustu veranna.

Verði það niðurstaða Alþingis er það í samræmi við lög ESB og myndi hafa mjög jákvæð áhrif á samkeppnisumhverfi gagnavera á Íslandi segir Jón. Samtök íslenskra gagnaverafyrirtækja töldu einnig nauðsynlegt að falla frá kröfu um að erlend fyrirtæki sem nýta sér þjónustu gagnavera hafi starfsstöð á Íslandi. Um það náðist ekki samstaða í efnahags- og skattanefnd.

Jón segir það miður og eflaust muni það stöðva einhverja viðskiptavini. Ekki sé útilokað að Alþingi geri frekari breytingar á frumvarpinu.

brjann@frettabladid.is