FME verði hluti af lausninni en ekki vandanum

Viðskipti Fjármálaeftirlitið (FME) hefur alls kært 43 mál til sérstaks saksóknara frá stofnun síðarnefnda embættisins. Þar af hafa sextán mál verið kærð undanfarið ár. Þetta er meðal þess sem fram kom á ársfundi FME í gær.

Í máli Lilju Ólafsdóttur, stjórnarformanns FME, kom fram að þegar hefði verið brugðist við athugasemdum sem fram komu í skýrslu rannsóknarnefndar Alþingis í garð FME. Hún sagði að ímyndunarafl og kunnátta fjármálamanna fyrir hrun hefði verið meira en svo að svifasein ríkisstofnun réði við það. Þeir hefðu verið eins og unglingar sem prófuðu allt sem þeir gátu en skildu ekki samfélagslega ábyrgð sína. Snar þáttur í að bæta ástandið væri að fræða fjármálafólk um hætturnar sem stafað geti af gjörðum þess.

Gunnar Þ. Andersen, forstjóri FME, sagði morgunljóst að frekari hagræðingu þyrfti í fjármálakerfinu til að fyrirtækin skiluðu nægum arði.

Árni Páll Árnason, efnahags- og viðskiptaráðherra, lagði í ræðu sinni áherslu á lagahyggjuna sem ríkti fyrir hrun. Bankamenn hafi verið sérfræðingar í að fara í kringum lögin en FME hafi einblínt á lagabókstafinn og ekki séð hvað var að. FME hafi verið hluti af vandamálinu og þurfi nú að vera hluti af lausninni.

„Við skulum ekki halda að við getum tamið ljónið – við þurfum að læra að lifa með því og vera ávallt meðvituð um hversu hættulegt það er. Og við þurfum að vernda almenning,“ sagði Árni Páll. - sh