Jón Daníelsson líkti ráðamönnum við jólasveina

Jón Daníelsson, hagfræðingur við London School of Economics, segir raunverulega hættu á því að Ísland verði fátækt land til frambúðar. Hann gagnrýnir mjög stefnu stjórnvalda í atvinnumálum og segir að atvinnustefnan virðist vera pólitískari í dag en frá því hann var barn.

Hann segir skammtímahugsun ráða för og segir að ráðamenn hafi litið út eins og jólasveinar sem snerust í hringi eftir dóm Hæstaréttar um ólögmæti gengistryggðra lána. Stjórnvöld hafi átt að vera undirbúin fyrir þá niðurstöðu. Það sama gildi um viðbrögð við skuldavanda heimilanna. Jón segir einnig að ekki sé búið að taka til í stjórnsýslunni eftir hrunið. Embættismannakerfið sé í rúst.

Jón hélt erindi á morgunfundi Íslenskra verðbréfa á Hótel Nordica í morgun. Í meðfylgjandi myndskeiði má sjá hluta úr ræðu hans.