Eignir innlánsstofnana lækkuðu um 27 milljarða í október

Heildareignir innlánsstofnana námu 2.833 milljörðum kr. í lok október og lækkuðu um 27,3 milljarða kr. frá síðasta mánuði. Innlendar eignir lækkuðu um 42,9 milljarða kr en erlendar eignir hækkuðu um 15,6 milljarða kr.

Þetta kemur fram í hagtölum Seðlabankans. Þar segir að heildarskuldir innlánsstofnana námu 2.435 milljörðum kr. í lok október. og lækkuðu um 77,4 milljarða kr. á milli mánaða. Innlendar skuldir lækkuðu um 64,45 milljarða kr. en erlendar skuldir lækkuðu um 13 milljarða kr.

Eigið fé innlánsstofnana nam í lok október 398 milljörðum kr. hækkaði um 50 milljarða kr. frá fyrra mánuði.

Í hagtölunum segir að útlán Arion banka hf, Íslandsbanka hf og NBI hf eru í þessum tölum metin á kaupvirði þ.e. því virði sem þessir aðilar keyptu útlánasafnið á af Kaupþing banka hf , Glitni hf og Landsbanka Íslands hf. Kaupvirðið er það virði sem vænt er að muni innheimtast af útlánunum. Virði útlánasafnsins endurspeglar því ekki skuldastöðu viðskiptavina.

Lánasöfnin eru endurmetin með reglubundnum hætti, sem getur leitt til hækkunar eða lækkunar á virði einstakra lána. Breytingar milli mánaða/ársfjórðunga á útlánasafni þessara aðila geta því stafað af endurmati á virði lána eða af raunverulegum lánahreyfingum.