5,2 milljarða hagnaður hjá Icelandair

Icelandair skilaði 5,2 milljarða króna hagnaði á þriðja ársfjórðungi ársins. Þetta er töluvert betri afkoma en á sama tímabili í fyrra þegar hagnaðurinn nam 4 milljörðum króna.

Í tilkynningu um uppgjörið segir að mikill munur sé á rekstrartekjum félagsins á milli ára en þær hafi aukist um 5,8 milljarða á fyrstu níu mánuðum ársins miðað við sama tímabil í fyrra. Á sama tímabili hafi rekstrargjöld aftur á móti aukist um 4 milljarða kr. milli ára.

„Bætt afkoma skýrist einkum af auknu framboði og aukinni sölu á Norður-Atlantshafsmarkaði en jafnframt af góðri sætanýtingu og tekjustýringu í leiðakerfi Icelandair,“ segir Björgólfur Jóhannsson, forstjóri Icelandair, í tilkynningunni. „Þrátt fyrir góða afkomu á fyrstu níu mánuðum ársins liggur fyrir að framundan eru tveir krefjandi ársfjórðungar. Áframhaldandi óvissa í íslensku efnahagslífi er fyrirtækinu kostnaðarsöm og á næsta ári eru líkur á að samkeppni í millilandaflugi til og frá Íslandi harðni umtalsvert.“