Gunnlaugur Sveinsson ráðinn útibússtjóri á Selfossi

Gunnlaugur Sveinsson hefur verið ráðinn útibússtjóri Landsbankans á Selfossi og tekur til starfa 1. desember. 34 sóttu um starfið sem auglýst var laust til umsóknar í október.

Gunnlaugur er reyndur bankamaður, hann starfaði hjá Landsbankanum á árunum 1980 - 1982, var skrifstofustjóri Iðnaðarbankans 1982 - 1990 og gegndi stöðu útibússtjóra hjá Íslandsbanka/Glitni á árabilinu 1990 - 2007 á Selfossi, við Stórhöfða og í Hafnarfirði. Frá árinu 2007 hefur hann verið framkvæmdastjóri FH.

Gunnlaugur hefur að auki sinnt fjölda trúnaðarstarfa fyrir félög og félagssamtök, m.a. Bridgefélag Selfoss, Bridgefélag Hafnarfjarðar, knattspyrnu- og handknattleiksdeild Selfoss, aðalstjórn FH og sóknarnefnd Hafnarfjarðarkirkju. Hann er kvæntur Elínu Ástráðsdóttur og á tvö uppkomin börn.