Yfir þriðjungur atvinnulausra án vinnu í meir en eitt ár

Enn fjölgar í þeim hópi einstaklinga sem hafa verið án atvinnu í meira en ár. Þeir voru nú í lok október 4.614 talsins en höfðu verið 4.534 í lok september. Þetta jafngildir 35% atvinnulausra í október sem er með hæsta hlutfalli sem mælst hefur.

Fjallað er um málið í Morgunkorni greiningar Íslandsbanka. Þar segir að ljóst er að þetta er mikill viðsnúningur frá því sem áður var, sem má glögglega sjá þegar litið er tvö ár aftur í tímann eða til þess tíma sem bankahrunið skall á með miklum látum. Í lok október árið 2008 höfðu 534 einstaklingar verið án atvinnu í 6 mánuði eða lengur, eða sem jafngildir 13% atvinnulausra, og þar af höfðu 245 verið án atvinnu í meira en ár, eða um 6% atvinnulausra.

Í lok október voru alls 13.280 einstaklingar atvinnulausir og höfðu 54% þeirra verið án atvinnu í 6 mánuði eða lengur. Þetta er nokkuð lægra hlutfall en mánuðinn á undan, en í lok september höfðu um 57% atvinnulausra einstaklinga verið án atvinnu í 6 mánuði eða lengur.

Greiningin segir að reikna megi með því að atvinnuleysi samkvæmt skráningu á vinnumiðlunum komi til með að aukast enn frekar eftir því sem líður á veturinn. Er það hvort tveggja vegna árstíðaráhrifa sem og vegna aðstæðna í atvinnulífinu. Á milli október og nóvember í fyrra fór atvinnuleysi úr 7,6% í 8,0% og er ekki við að búast að annað verði upp á teningnum í ár.

Eru því horfur á að atvinnuástandið versni enn frekar nú í nóvember og áætlar Vinnumálastofnun að atvinnuleysi komi til með að verða á bilinu 7,6%-8,0% í þeim mánuði.